Асноўныя падзеі па праву разгарнуліся на бульвары Ленінскага камсамола. У 70-я гады новая вуліца атрымала такую назву па ініцыятыве гаркама камсамола, якім тады кіраваў Георгій Забродскі. У дні святкавання 100-годдзя з дня ўтварэння ВЛКСМ ветэран легендарнай арганізацыі зноў у дарагім сэрцу месцы. Былыя камсамольцы, а таксама прадстаўнікі моладзевага руху высадзілі тут кляновую алею, якая ўжо вясной парадуе жыхароў бульвара і мінакоў зялёным лісцем, і будзе яшчэ доўгія гады нагадваць пра векавы юбілей.
– Высадзіць кляновую алею на вуліцы з сімвалічнай назвай прапанавалі члены гарадской маладзёжнай арганізацыі, а ветэраны камсамола нас падтрымалі. Атрымалася цудоўная сустрэча старэйшага і малодшага пакалення моладзевага руху, нам ёсць аб чым пагаварыць. І прыемна, што новыя праекты мы можам рабіць разам, – адзначыла першы сакратар гаркама ГА «БРСМ» Зоя Міткоўская.
21 клён высадзілі ветэраны камсамола і члены БРСМ, сярод якіх прадстаўнікі першасных арганізацый прадпрыемства «Гроднагандальсэрвіс» і Гродзенскага дзяржаўнага медыцынскага універсітэта.
Будучы лекар Аляксандр Кулеш кожны дзень бывае на БЛК: тут яго родны вну, тут у інтэрнатах жывуць аднагрупнікі і сябры. Кажа, адразу адгукнуўся паўдзельнічаць у закладцы алеі.
– Цікава паглядзець, якімі вырастуць дрэвы праз 10-20 гадоў. Напэўна, будуць вялікімі, а горад стане яшчэ прыгажэй і, галоўнае, зелянейшым, – разважае хлопец.
Такімі ж маладымі, летуценнымі, актыўнымі былі ў сваю камсамольскую маладосць ветэраны ВЛКСМ. Сёння яны быццам памаладзелі і вярнуліся на 40, 50, 60 гадоў таму...
Па матэрыялах «Гродзенская праўда»