Адразу дзве выставы адкрыліся ў Гродзенскай выставачнай зале. Ігар Падлужны працуе ў колеры. Цяпер ён прадставіў свае жывапісныя працы. Пераважная большасць-рэальныя пейзажы. У Ігара ёсць яшчэ адно хобі-рыбалка. Ён шмат часу праводзіць на прыродзе, таму натхнення колерам і відамі яму не займаць. Адсюль багацце яркіх фарбаў і дакладных вобразаў. Сярод карцін сустракаюцца і эцюдныя, аднак сам аўтар аддае перавагу тым, што ён змаляваў з рэальных месцаў, якія зрабілі на яго ўражанне. Прызнаецца, ад гледача чакае такога ж захаплення.
ІГАР СТАВЕР, АЎТАР ВЫСТАВЫ «МОЙ СВЕТ»:
- Я быў на рыбалцы. Сядзеў сваіх пяць гадзін, ніводнай паклёўкі. Я ўжо ледзь не завыў ад крыўды. Паглядзеў на неба: якія прыгожыя аблокі, як яны выразна выстройваюцца. На шчасце - з сабой быў эцюднік. Я хутка схапіў яго і пачаў пісаць. Зрабіў эцюд і падзякаваў Богу, што рыба не дзяўбла, што я ўбачыў гэтую прыгажосць. Калі быў клёў, гэтая праца не нарадзілася б.
Аўтар другой выставы Барыс Бокша супраць колеру нічога не мае, але свае працы выконвае выключна ў чорна-белых танах. Тая ж прырода, жывёльны і раслінны свет, толькі пазбаўлены яркіх фарбаў. Замест іх дэталёвая дакладнасць. Барыс Бокша практычна не працуе з маслам або фарбамі. У яго арсенале інструментаў на першым месцы туш. Адсюль графічнае бачанне звыклай чалавеку прыроды.
БАРЫС БОКША, АЎТАР ВЫСТАВЫ “ЧОРНАЯ-БЕЛЫЯ ВАНДРОЎКІ”:
- Я заўсёды люблю, калі езджу ў музеі, мне заўсёды падабаецца разгледзець. Гэта цікава, калі ёсць што разгледзець, ёсць агульнае ўражанне, а ёсць дэталі. Мне цікавыя дэталі.
Па матэрыялах «Гродна Плюс»