Музеі і галерэі

Музеі
 
 

Дзяржаўны гісторыка-археалагічны музей (вул. Замкавая, 20).

Тэл. +375 152 74 25 13, сайт: www.gosmuzeireligii.grodno.by  
 

У гістарычным цэнтры Гродна, на замкавай гары, знаходзіцца гісторыка-археалагічны музей. Дзякуючы нястомнай працы гродзенца Ю. Іадкоўскага ў 1921 годзе ў будынку Новага замка была адкрыта першая музейная выстава. Напачатку 1930-х гадоў магістрат Гродна перадаў музею будынак старога замка. У канцы 1980 года перададзена частка Новага замка. Агульны фонд калекцый музея налічваў звыш 180 тысяч прадметаў.

 

Стары замак (вул. Замкавая, 20, тел. +375 152 72 18 51).

Стары замак быў збудаваны для караля Стэфана Баторыя дойлідам Санці Гучы з Фларэнцыі на руінах старажытнага Верхняга замка. Ад прыйшоўшых у заняпад пабудоў часоў вялікага князя Вітаўта выкарысталі ніжнюю частку абарончых сцен, рэшткі вежы, а таксама падмуркі і сцены княжацкага палаца.

На працягу больш за 120 гадоў Стары замак належыў вайсковаму ведамству, а ў 1924 годзе быў перададзены музею.

Уключае экспазыцыі археалогіі, гісторыі, традыцыйнага рамяства, прыроды.

 

Новы замак

Будаўніцтва Новага замка, спраектаванага Карлам Фрыдрыхам Пепельманам, доўжылася з 1737 па 1742 год. Ён быў збудаваны на суседнім з Замкавай гарой узвышшы, насупраць Старога замка.

У сярэдзіне 19 стагоддзя ў Новым замку праводзіўся вялікі рамонт, падчас якога частка памяшканняў была перабудавана. Будынак вельмі пацярпеў і падчас баёў за горад у 1944 годзе. Аднаўленнем палаца і прыстасаваннем яго пад адміністрацыйную ўстанову кіраваў архітэктар Уладзімір Вараксін. Палац набыў так званы класічны псеўдарускі стыль. З 1952 года ў Новым замку размяшчаўся Гродзенскі абласны камітэт КПБ. Пасля перадачы палаца ўстановам культуры ў 1991 годзе, яго галоўны корпус і левае крыло перадалі музею. Памяшканні былі рэканструяваны ў анфілады выставачных залаў, а частка іх прыстасавана пад запаснікі.
 

Літаратурны аддзел «Музей Максіма Багдановіча» (вул. 1 Мая, 10)

Тэл.+375 152 72 22 54
Сайт: www.bogdanovich.grodno.by
Час працы: з 9.30 да 17.30, выхадны – нядзеля, панядзелак

Адкрыты ў 1982 годзе ў доме, у якім з чэрвеня 1892 па лістапад 1896 года разам з бацькамі жыў будучы беларускі паэт Максім Багдановіч. Экспазіцыі знаёмяць з абліччам Гродна канца XIX – пачатку XX стагоддзяў. Экспануюцца сямейныя фатаграфіі Багдановічаў, асабістыя рэчы паэта, адзінае прыжыццёвае выданне зборніка паэта «Вянок» (1913 год). Стэнды знаёмяць з дзейнасцю рэдакцый газет «Наша ніва» і «Загляне сонца і ў наша аконца». Частка пакояў рэканструявана, іх аблічча ўзнаўляе інтэр’ер дома Багдановічаў у канцы XIX стагоддзя.

 
 
 
 
 
 
 
 
 
 

 
 

 
 

 
Гродзенскі дзяржаўны музей гісторыі рэлігіі (вул. Замкавая, 16).
Тэл.+375 152 74 25 13, сайт: www.gosmuzeireligii.grodno.by  
 

Будынак «Гродзенскага дзяржаўнага музея гісторыі рэлігіі» — палац XVIII-XIX стст.

Заснаваны ў 1977 годзе. У фондах музея - 56,5 тысячы экспанатаў. У тым ліку калекцыі сакральнага жывапісу і скульптуры, мастацкага ліцця, прадметы этнаграфіі, дэкаратыўна-прыкладнага мастацтва, графікі..

 

Мемарыяльны пакой-музей Э.Ажэшка ў юнацкім філіяле ГУК «Гродзенская абласная навуковая бібліятэка ім. Я.Ф.Карскага» (вул. Э.Ажэшка, 17).
Тэл.+375 152 74 30 67
Час працы: з 10.00 да 18.00, выхадны - субота, нядзеля.

Домік Элізы Ажэшкі ў Гродне створаны ў доме пісьменніцы, дзе яна жыла з 1894 па 1910 год. У 1967 годзе ў чытальнай зале юнацкага філіяла была створана экспазіцыя, прысвечаная жыццю і творчасці Элізы Ажэшкі. У 2001 годзе ў пакоях, дзе пры жыцці пісьменніцы размяшчаліся працоўны кабінет і малы салон, былі адноўлены інтэр’еры па фотаздымках, якія захаваліся. Пакоі абстаўлены мэбляй і прадметамі эпохі Элізы Ажэшкі. З арыгінальных прадметаўтут знаходзяцца: камін і люстэрка, гербарыі, зробленыя самой Ажэшкай, прыжыццёвыя фота і кнігі пісьменніцы. У доме захаваліся таксама арыгінальныя драўляныя элементы ўваходнага тамбура і балконная агароджа. У сакавіку 2009 года пасля праведзенай рэканструкцыі ўсяго дома, пакоі былі зноў адкрыты для наведванняў. Дэманстрацыйная плошча залаў складае 34,1 м. кв. Асноўны фонд музея налічвае 70 прадметаў.

 

Музей "Гісторыі Гарадніцы" (вул. Ожэшка, 37).
Тел. +375 152 72-16-69.
Час працы: з 10.00 да 17.30, выхадны - нядзеля, панядзелак.
 

Экспазіцыя прысвечана рэфарматарскай дзейнасці А.Тызенгауза ў Гродне. Тут прадстаўлены макет Гарадніцы, экспаніруюцца тавары гродзенскіх каралеўскіх мануфактур XVIII стагоддзя.

 
 
 

Музей сучаснай народнай творчасці Гродзеншчыны (вул. Савецкая, 8).

Сайт: www.gromc.by


Тэл. +375 152 72 17 87.
Час працы: 9.00 - 13.00, 14.00 - 17.00; выхадны – субота, нядзеля.

 
Першы ў Беларусі (сярод абласных метадычных цэнтраў народнай творчасці) музей сучаснага народнага і самадзейнага мастацтва быў заснаваны пры Гродзенскім абласным Доме народнай творчасці ў 1965 годзе. Яго фонды – адлюстраванне творчых дасягненняў майстроў і мастакоў Гродзеншчыны. Выставачная дзейнасць дазваляе шырока прадставіць тыя віды мастацтва і рамёстваў, якія з даўніх часоў існавалі ў нашых продкаў, а сёння знаходзяць свой працяг у творчасці сучаснікаў.

За шматгадовую гісторыю ў выставачнай зале музея АМЦНТ было арганізавана больш за 400 тэматычных, групавых і персанальных выстаў. Стала добрай традыцыяй арганізоўваць у музеі выставы і агляды-конкурсы раённых дамоў і цэнтраў рамёстваў, студый выяўленчага і дэкаратыўна-прыкладнога мастацтва. Выставачная зала музея адкрывае свае дзверы як для майстроў і мастакоў вобласці, так і для таленавітай моладзі. 
 
 

Музей-аптэка (пл. Савецкая, 4).

Тэл.+ 375 152 74 00 81

Час працы:
У Гродне існуе ўнікальная, адзіная ў краіне аптэка-музей. Яна размяшчаецца ў гістарычным будынку найстарэйшай у Беларусі езуіцкай аптэкі. Будынак уваходзіць у комплекс гродзенскага езуіцкага манастыра – помніка гісторыі і культуры XVIII стагоддзя, які займае значную тэрыторыю ў цэнтральнай частцы горада, што прымыкае да галоўнай плошчы. Езуіты пабудавалі будынак аптэкі у 1709 г., дзе яна і праіснавала, нягледзячы на змену уладальнікаў, да 1950г. Пазней аптэку тут замяніў медыцынскі склад, салон мэблі, Дом настаўніка. Другое нараджэнне езуіцкая аптэка атрымала ў 1996 годзе, калі частку яе памяшканняў аднавіў навукова-вытворчы кааператыў «Біятэст». Экспазіцыя знаёміць з развіццём фармацыі ў Гродне, дэманструе калекцыю аптэчнага посуду канца XIX – першай паловы XX стагоддзяў.

 
 
Галерэі і выставачныя залы
 
 

Гродзенская выставачная зала (вул. Ажэшка, 38).

Тэл. +375 152 72 07 42.

 

Дзяржаўная ўстанова культуры «Гродзенская выставачная зала» ўтворана ў 2004 годзе. Агульная плошча - 250 м2 .

 

Выставачная зала супрацоўнічае з Гродзенскім абласным аддзяленнем Беларускага Саюза мастакоў, народным аматарскім аб'яднаннем майстроў народнай творчасці і мастакоў «Гарадзенскі каларыт», кафедрай выяўленчага мастацтва факультэта мастацтваў установы адукацыі «Гродзенскі дзяржаўны ўніверсітэт ім. Я. Купалы», народным фотаклубам «Гародня», праводзіць выставы мастакоў гарадоў-пабрацімаў горада Гродна.

 

Стала добрай традыцыяй на базе Гродзенскай выставачнай залы праводзіць міжнародны мастацкі пленэр «Гродна - дарог скрыжаванне», удзельнікамі якога з'яўляюцца мастакі з пяці краін-суседак.

 

У малой зале арганізавана выстава-продаж мастацкіх твораў.

 

Галерэя "Тызенгауз" (пл. Тызенгауза, 4, тэл. +375 152 72-27-57).

http://www.t-gallery.grodno.by/, e-mail: tgallery@tut.by .

Час працы: з 10.00 да 18.00 (без выхадных).

Гродна, адзін з найстарэйшых гарадоў Беларусі, які валодае багатай гістарычнай і культурнай спадчынай. Слава і вядомасць гарадоў залежыць ад многіх прычын і заўсёды ад людзей, якія жывуць у іх. Гродна ніколі не быў абдзелены моцнымі і творчымі асобамі.

Неацэнны ўклад у развіццё горада ўнёс Антоній Тызенгаўз (1733-1785) падскарбій надворны літоўскі, гродзенскі стараста. Па яго ініцыятыве былі заснаваныя каралеўскія мануфактуры, пабудаваны комплекс Гарадніца, створаны тэатр і капэла Тызенгаўза, тэатральная, медыцынская, мастацкая і будаўнічая школы, кадэцкі корпус, закладзены батанічны сад, выдавалася першая ў Беларусі газета.

Пры галерэі працуе салон, дзе можна набыць мастацкія творы, а таксама атрымаць кансультацыі па фарміраванні карпаратыўных і прыватных калекцый, афармленні інтэр’ераў, антыкварыяту.

У салоне прадстаўлены шырокі асартымент мастацкіх матэрыялаў для творчасці і афармлення работ.

Акрамя актыўнай выставачнай дзейнасці(каля 10-ці праектаў у год) галерэя пастаянна праводзіць камерныя канцэрты старадаўняй музыкі, а таксама семінары па розных напрамках культуры.
 
 

Галерэя "У Майстра" (вул. Кірава, 8, тэл. +375 152 74-09-70).

 
Выстава-продаж работ гродзенскіх мастакоў (жывапіс, графіка, ДПІ).
Вялікі выбар мастацкіх матэрыялаў.
Час працы: 10.00 - 18.00, субота: 11.00 - 15.00, выхадны - нядзеля.
.
 

Версія для друку